27 ene 2014

FILANDÓN EN SAN ROMÁN DE LA VEGA
El próximu sábadu, día 1 de febreiru, va celebrase na Casa Conceyu de San Román de la Vega un filandón a las 18:00h. organizáu pola Asociación Cultural Faceira y pola Asociación Cultural de San Román de la Vega.

Hai años, cuando los filandones se facían nas cocinas, el día de Santa Brígida yera l’últimu no que se vivían estas reuniones ya que dende esa fecha empezaban los llabores del campu. Esta festividá seique tien un orixe precristianu, pues el día 1 de febreiru los celtas irlandeses paganos conmemoraban la fiesta de Imbolc cumo ritual de la fertilidá dedicáu a la diosa Brigit.

Con esti motivu, estas dúas asociaciones organizarán un filandón na Casa Conceyu no que se tratará cualesquier tema, cumo pasaba nas cocinas, pero atendiendo especialmente a cousas de pastores, ya que al final d’ésti las muyeres del coru de San Román acompañadas cona música –rabel- de Fran Allegre interpretarán el romance de La lloba parda na sua versión llionesa. A lo llargo del filandón peguntaráse a los asistentes pol nome tradicional cono que se conoz todo aquello propiu del mundu pastoril, asina cumo lliendas de llobos y anécdotas.

Invitamos a tódalas personas que quieran acercase a San Román que participen nesti filandón, que será, cumo siempres, la fiesta de la palabra.


No hay comentarios: